宗師榮休大典

1972年12月1日港九螳螂拳同學會舉行宗師榮休典禮。

剛從舊篋中撿出宗師榮休大典講話錄音，語重心長。已進行數碼化。文字檔若有錯漏，以宗師原音為準。

各位嘉賓，各位同學，希望我今日所講到嘅嘢〔大家能聽到〕。好唔好彩我口腔裏面有病，所以講嘢唔係幾方便。
〔現時〕最主要嘅問題就喺，我教拳四十年，先後期嘅同學，可能係兩父子、或者係兩公孫。因為年齡嘅關係、先後期嘅關係，所以會有一種隔膜。多年以來哩種嘅隔膜都喺存在，咁樣哩就，令到外間知道我哋螳螂拳喺港九處甚不團結，哩個喺無可諱言嘅，大家心中了了，大家都會明白。哩個係幾唔好彩，幾唔好嘅現象。到現在我都已經係退休啦，即係可以講話，脫離咗武術。過去名、利各方面，都已經喺無咗我嘅企圖，至於權力，哩個喺好虛幻嘅。今晚你地推舉左我做宗師。喺我門下嘅，唔喺我門下，我就唔敢擔承。既屬我門下嘅人，一致推舉左我做宗師。哩個就係一種你授比我嘅權力。哩個權力並唔喺叫你哋去跳火坑，並唔喺叫你哋走去做一種非法妄為嘅事，而係希望你哋發揚前人創業嘅艱難，光大我哋螳螂門。我有哩個責任，我應該負起哩個責任，使到螳螂拳突飛猛進，唔只話滿足現狀。
剛才我講過就喺一種責任，就喺種種關係就係造成一種隔膜，由哩種隔膜產生好多誤會，由誤會又會變成恩怨，咁樣幾不幸哩！我希望從今晚以後，大家要發揚螳螂拳，大家兄弟叔侄，父子公孫，哩個唔喺話真喺父子公孫，喺借用，例如話師公、徒孫可以話公孫，師傅、徒弟可以話喺父子，師叔、師伯、師侄可以話喺叔侄。即係一種咁親切嘅，應該大家去維繫，唔應該大家存疑、攻擊。
譬如有人話，某一個同學，講佢短處，我哋閘住。同學方面應該要維護佢，唔應該加鹽加醋，借用外力走去自傷殘殺，為咗利害、為咗虛榮而淹沒自己良心。咁樣喺唔好嘅，要不得嘅，希望你哋自今以後，秉住哩一個精神，唔好違背哩個精神，咁樣螳螂拳終需傳到世界。
例如哩三位同學，黃漢超，已經喺博士學位；黎達沖，就喺電腦嘅專家嚟嘅；鄺巨堂，喺香港過去嘅，咁三位同學喺美國各據一方。家下黎達沖……拳擊比賽，擊敗好多五段、六段嘅嗰啲所謂某某道，而家吓哩喺果邊擁有幾百學生。哩的亦都唔係我黃某人個人嘅光榮，而喺大眾嘅光榮，我哋同學咁威水嘅，喺美國咁架勢嘅，喺大家嘅光榮。大家要知道，我哋鄰近嘅國家〔概指日本〕想去外國處教授武術嘅人都經過佢嘅國家審核過佢嘅人格、道德、學問，然後先去得，但我哋中國就唔喺嘅，求其識兩下功夫，日頭刨薯仔、夜晚教功夫，就品德學問多年都喺追人家唔上。所以歷向就喺，同人比較有一個好遠嘅距離。不過我哋好僥倖有幾位同學都係經過咁高深嘅學問，咁高深嘅學位，而能夠喺嗰度發揚螳螂拳。
黃漢超喺哈佛、喺〔麻省〕理工學院，喺舉世聞名嘅學府，喺嗰兩學院度擔任教武術，佢並唔喺為名，唔喺為左利，佢一定要發揚螳螂拳。咁樣哩啲喺好難得嘅。所以我希望大家練功夫以外，都要練好自己品德，揸好自己嘅學問，咁樣哩然後，你喺一個完整嘅人才，唔喺話我識兩下拳腳，我好打得。好打又點，萬人敵呀？幾時可以萬人敵？現在社會所需要嘅，喺存在嘅〔存在這種需要〕，唔喺話識兩下功夫就可以嚇人嘅，一定要有學問，品德、功夫……唔喺話咁容易嘅。大家年青一輩，都係有為嘅青年，我希望大家從此以後應該喺師叔就師叔，師伯就師伯，大家要互相尊重。並唔喺話師公好過徒孫，師公亦係人，徒孫亦係人，應該後浪推前浪，如果唔係就永不進步，希望大家從今晚以後，同喺螳螂拳嘅同學都要互相尊敬，努力去發揚，有一個好好嘅收穫。