螳螂拳要義

這是宗師僅存語音檔,1960年代用盤式錄音機錄制,現數碼化,格外珍貴。文字檔若有錯漏,以宗師原音為準。

我喺《螳螂拳起源與系統》裡面呢,曾經講過螳螂拳呢係由十八家…就合成既,呢個十八家呢就係以太祖啲長拳為起首。太祖即係指宋太祖趙匡胤,為起首既。咁樣我現在呢就將太祖啲訪友歌呢先行錄出黎。宋太祖既訪友歌佢係咁話既:

太祖長拳甚可嘉,天下雲遊訪大家。鰲裡奪粹高一著,韓通從此把名窪。

強中自有強中手,何須逞強太自誇。鄭恩旁觀看得破,通臂猿猴更不差。

通拳又被纏封打,只顯他人不顯咱。寰中武士參不透,深如東海細如麻。

(02:08 – 02:49)

咁樣呢首太祖既訪友歌呢,就係載喺《少林真傳》裡面既。咁據說呀,十八家就係…以螳螂拳為總,以太祖的長拳為起首既。咁十八家既次序呢,就係咁樣既:

太祖的長拳起首,韓通的通背為母。

鄭恩的纏封尤妙,溫元的短拳更奇。

馬籍的短打最奇,孫恆的猴拳且盛。

黃粘的靠身難近,綿世的面掌飛疾。

金相的磕手通拳,懷德的摔捋硬崩。

劉興的抅摟採手,譚方的滾漏貫耳。

燕青的占拿跌法,林沖的鴛鴦腳強。

孟甦的七勢連拳,崔連的窩裏剖錘。

楊滾的棍採直入,王朗的螳螂總敵。(03:19 – 04:23)

咁樣呢個十八家呢就係以宋太祖既長拳為起首,以王朗既螳螂為總敵。呢個總敵既意思呢,並不是呀將十八家既…認為係個敵人,實在佢既含意呢,即係將十七家既好處呀,與共佢既方式呢,係灌咗入螳螂拳裡面既。即言之,纏封,「鄭恩的纏封」,咁呀…現在…躲剛呀,與共好多拳裡面既所謂內纏絲、外纏絲、小纏絲、大纏絲、封手統錘諸如此類既方式呢,都係喺嗰度黎到分化出黎既。「綿世的面掌飛疾」裡面呀,即言之…飛雁掌呀,與共反掌呀迎面掌呀,滾漏手之類既方式,亦喺嗰度處抽出黎既。「懷德的摔捋硬崩」呢,螳螂拳裡面好多方式呀,都係出自…懷德既方法黎既。即係插錘有摔捋兩分,呢啲手法就係喺呢度黎㗎嘞。「劉興的抅摟採手」抅摟採手呀,人人都…差唔多都知道呀,就係螳螂拳每一套拳裡面呢都有既。「燕青的占拿跌法」大致黎講,即係螳螂拳裡面呀蹬[足甫]呀、前勾後彈呀呢種咁既腿法呢,都係喺呢度出既。「楊滾的棍採直入」棍,就係一曲一直,就為之棍手,即係螳螂拳既十四路之中呀既第九路,就係叫做棍手。棍,而加入採,採而又棍,呢個就係一個變通既辦法黎既。所以王朗既螳螂呀,就係有以上十七家既方式呢係包括在內既。(07:44)

(07:53)螳螂拳呀有所謂八打、八不打。呢一個方法呀,就係指人身上每一個位置,都係用好容易被敵人襲擊既位置。舉其大既位置呢,去到使到我地去學螳螂拳既人,都要加以防範。第一,固然唔想俾人向著我地呢個位置黎到擊中,而我本人黎講呀,又唔好隨便咁…向敵方黎到襲擊呢個位置。八打,就係話呢,佢個位置呀雖然係好容易令到對方呢受到好大既痛苦,但係呢佢…無生命危險既,所以呢,呢個八打既…既意思呀,即係話可以打。咁樣佢既位置呢,就係咁樣: 

  1. 眉頭雙睛;
  2. 唇上人中;
  3. 穿腮耳門;
  4. 背後骨縫;
  5. 脅內肺腑;
  6. 撩陰高骨;
  7. 虎頭鶴膝;
  8. 破骨千斤。(09:46)

第一既眉頭雙睛,就係兩度眼眉之中間,嗰個位置呢就係叫做眉頭雙睛。第二,唇上人中,就係上唇和鼻下嗰個位置呢就係嘞。三,穿腮耳門,就係…(10:16 – 10:47)即係一般俗語所謂胳肋底。六,撩陰高骨,就係肚臍對下而陰部之上嗰個就係叫做撩陰高骨。七,虎頭鶴膝。虎頭鶴膝呢就係膝頭。假使對方呀用腳黎襲擊我既時候呢,我如果有機會呀,就向佢既膝部打下,咁樣不只話我唔俾佢踢著,反而呢佢所受既痛苦呀…好嚴重㗎。八,破骨千斤,嗰個就係打人先打手既原則。假使對方用手打過黎,我用橫拳打落,向佢手踭…嗰個位置打落呢,嗰個就係破骨千斤。呢八個位置如果俾人打著呢,係相當痛苦既。隨時呀都…再無還擊之力㗎嘞。咁所以佢八打呢,即係話雖然係使到人呀受好大既痛苦啫,但係呢無生命危險既。咁所以呢個八打呢,就係話隨時可以拿出黎打。還有八不打呢,八不打都係致命既位置。固然呀又唔好俾敵方黎到打著,站在自己本身去講呀,亦唔應該俾人打著。如果呢個位置呀一下錯手打著呢,好容易令到對方喪生既。

  1. 不打太陽為首;
  2. 不打正中鎖喉;
  3. 不打中心兩壁;
  4. 不打兩肋太極;
  5. 不打海底撩陰;
  6. 不打兩腎對心;
  7. 不打尾閭風府;
  8. 不打兩耳扇風。(13:30)

呢個太陽為首呀,就即係俗語所謂…魂精,即係兩邊太陽穴,任何一邊呀…打著呢都隨時可以重傷倒地既。呢個太陽穴就係曝露於敵人之前既,好容易呀被人擊著,咁所以呢,呢個位置就係要萬分留心,唔好話疏忽咗。二,二不打正中鎖喉。正中鎖喉係…嗰個喉部嗰度呢,就…用鎖喉既方法呀,隨時都可以…向正中黎鎖入,一扣著佢對方既喉欖呢,好容易呢就係令到對方會窒息㗎,呢個又係死亡既位置黎。三不打中心兩壁,即係前後相對既…喺個…個人身上既最中心既位置。四不打兩肋太極,即係俗語呀小腌嗰個地方,用雙掌黎到切入呢,好容易呢就…令到對方呀死亡㗎。五不打海底撩陰。海底撩陰,大概黎講呀,凡練武既人呢都了解係邊一個位置。多數去講呢,係用腳黎到襲擊,上撩陰腿之類呢,就係專向呢個位置黎襲擊既。其餘呀,單臂爪呀呢種咁既手法呢,亦係向呢個位置去攻擊。六不打兩腎對心,就係兩邊乳門下一寸,用雙錘黎到撞入,呢個位置又係好重要㗎。七不打尾閭風府,尾閭風府就係喺尾龍骨對下,嗰個位置呢百分之百都係要用腳黎踢既,所以呀有啲未曾練過武而練武不精既人呢,隨時大家兩朋友相玩呢,動不動就起腳黎到踢對方既屁股呢,呢個實在係好危險既,一下不留心呢,如果踢著呢個尾閭風府個位置呀,就由玩而變到誤及對方既生命,故此呢我特別要提供俾各同學呀,切不可隨便起腳呀,向對方既屁股踢去,呢個實在係玩唔過㗎。八不打兩耳扇風。兩耳扇風呀,就係兩邊耳同時用掌黎拍入,咁樣呢,一拍呢就可能令到對方就死亡㗎。如果用單掌黎是但襲擊一邊呢,佢嗰個危險既程度呀就減咗大半㗎。如果用雙掌黎拍入呢…萬分危險㗎。咁所以呢,呢個兩耳扇風呀,睇黎就係好平常既位置,實在…就係相當危險既。(17:55)

(18:05)我現在所要講既,就係有關初學拳既同學應該要注意既地方。每一個初學拳既人呀,佢一經上堂呢,睇見好多同學都係玩得興高采烈,刀呀,槍呀,劍呀…都舞得相當好,於是佢個心呢就好羨慕,由羨慕呢,佢又想急於呀…就…學到,學先進同學既技能。呢一個心理呢,大概黎講呀,人人都有種咁既懷著㗎,但係新學既同學應該要知道,每一個人呀所學,不論任何一種技術,都要經過相當時間,然後呢,有好既成就,有好既表現。羨慕,只管去羨慕,呢個呀,本來就係無可厚非既,但係應該要自己呀從頭去…從頭去做起,唔好只顧係隨便去羨慕,羨慕係得唔到結果既。因此,我要對大家黎到詳細啲講下,我本人呀學拳既時候呢,亦都係曾經有過呢種咁既思想,因此呢種就係經驗之談。(20:10)

螳螂拳本來就好快捷既拳術,佢既動作,每一套拳之間呢,都係通常四、五十個動作既啫,但係佢練起上黎既時候呢,必須…必須要一氣呀…就連貫㗎,不能夠呢就中斷,或係或快或慢,咁呢種呢,就係一種毛病黎既。咁我地想要做得…好既時候呢,必須要根據住出手快,盤架慢。盤架,換言之就即係每一個姿勢都要做得好、正確,然後呢,每操練一套拳既時候呀,出手雖然係好快,但係佢嗰個姿勢呀,應該要盤定,即係擺定,令到在場的每一個人呢都睇清楚佢個姿勢,係乜嘢既步法。由手法與步法呢係必須連合,由一個一個姿勢咁樣去連呢,出手,點樣快捷,呢個唔成問題既,至緊要唔好含糊,正所謂亂七八糟咁,嗰手都未打得盡又去第二手,咁樣呢就係大失嗰個…螳螂拳既原則。(22:32)

(22:36)以往呀就練拳呢,多數呢要操拳㗎,操拳本來呢亦有好亦有壞。好的方面去講,就係呀使到每一個同學,每一個姿勢有唔正確的地方呢,擔任指導既人呢,可以慢慢去糾正佢。而且,佢每一個姿勢呢,係停留相當時間,使到指導者有機會去糾正既…錯誤既同學,而正確既同學呢,亦有機會呀打破姿勢而去佈定,咁樣呢就係好處之一。其次呢,佢能夠呀…在集體方面去求進步,即係一班同學之中,佢既進度情形呢,差唔多都係劃一既。但係壞的方面呢,就可能影響到…某個同學,佢既動作本來係非常正確,同時呢佢又好活潑、好靈敏,但係呢,因為佢要遷就其他既同學,所以到呢…令到佢呢跟埋一齊去…遲滯咗佢既拳法。呢個呢就係毛病之一,如果佢能夠變通佢自己既頭腦呀,集體既時候應該要咁做,輪到自己個人練習既時候,又將嗰個作風呢黎到改變一下,不能夠呀一成不變咁樣,集體又係咁樣,個人又係咁樣。故此,有好多人呀以為學拳術就係運動之一,不外係四肢運動既啫,唔需要用腦㗎?呢個就係大錯特錯㗎。即言之近代既體育,如足球呀,籃球呀,排球呀,網球呀,嗰個集體式既…國技呢,都係有佢所謂戰術、戰略、陣法,各方面黎形成㗎。你且問一隊球隊裡面呀,不論任何一種球隊,佢都需要一個教練。教練係好既時候,會令到整隊球隊呢,都有合理的演出。因此可以知道呀,個教練呢足以影響到全隊既球隊㗎。咁如果有一個突出啲既球員呢,佢個腦筋呢就非常機警既,咁樣呢我地隨時隨地呀,凡係有…睇頭既人呢,都可以見得到,佢係有領導作用既,否則呢,人人都橫衝直撞,人人都拿出佢自己本人既技術出黎呢,咁樣就唔成一個集體既隊伍㗎嘞。(26:57)

咁拳術方面呢,雖然呀就係本身上以四肢去運動,佢除咗運動之外呢,還要分開…敵方、本身,咁樣到臨場應敵既時候,就係要有一個好機警既變化,然後呢至可以運用自如既。咁平日練拳既時候呀,唔好盲目的去打,應該呀在自己的面前,要幻想到一個敵人出黎,呢個敵人呢就係假想敵人黎㗎,咁我呢一拳向中部去攻擊既,呢個呀敵人呢就會係咁樣俾我擊到呀,同時呀我又起腳去襲擊對方既下盤,而對方呢又會俾我擊著㗎,或係向後、向右、向前黎到躲避我㗎嘞。咁樣呢要幻生咗一個假想既敵人,嗰啲拳呀與腳呢,不能夠隨意咁樣使出去。嗰個位置、尺寸應該係要好準確,時時都要留心著自己嗰隻腳,踢向邊一方面,唔好隨便…鍾意就高啲,唔高與既時候低啲,係漫無目標既。一經習慣咗之後呀,佢既拳法呢好含糊㗎,例如呀扎腳係不過膝既,即係對方既膝;閉門腳不過對方既肚;穿心腳不能過對方既頭,唔好話以為我嗰隻腳係可以起得好高既,隨便去起高,呢個呢就係唔合適既。(29:47)

至於初學拳術既人呀,係常常有咁既感覺:嗰個腳方面呢,嗰個膝下既筋絡呢係掹掹緊既,令到佢呀唔係好容易咁踢得起對腳,呢個就係一個原因。呢個原因呢需要多拗啲腿, 令到膝下既筋絡呢鬆咗,佢就自然唔會牽強㗎嘞。第二點呢就係要注意到呀,站著地下既腳呢,使出…發嗰隻腳呢更要用得力多既。例如我兩隻腳合埋呢,有一百斤力。站在地下嗰隻腳呢,要留番六十斤以上。踢出嗰隻腳呢,僅僅呀係使得出三十五斤至四十斤之間既啫,不能夠過咗個限度,如果過咗個限度呢,就會失咗自己既重心。其次呢,就係初學拳術既人呀,每每感覺到佢既發力呢就喺個肩膊上面處。肩膊,就係指…速力,係唔可以發力,發力呢,必須要由肩膊直達肘部,肘部移到腕部,腕部移到拳鋒外面,呢個至係發力既正確。肩,一定要鬆,即係與腿一樣,如果唔鬆,嗰啲力度呀就係速而不發。外行既人,睇…睇佢以為呢佢好有力,但係佢個拳鋒外面呢係透唔過既,所以佢啲力度呀只有係速而不發,中看不中吃既。呢個…關於呢個肩膀上面呀,係要多啲用番車既方式,將嗰個肩部呢盡量去靈活佢,與拗腿呢係有異曲同工之妙既。故此初學既同學呀,唔好話急於求進步,需要打好自己既基礎,然後呢至係有進步既。(32:56)